പാചകപുസ്തകം രചിച്ച , പുൽച്ചാടികളെ ഭയപ്പെട്ടിരുന്ന സറിയലിസ്റ്റ്

    മെയ് 11... ഇരുപതാം നൂറ്റാണ്ടിലെ ഏറ്റവും പ്രശസ്തനായ സറിയലിസ്റ്റ് ചിത്രകാരനും , ചെറിയ പ്രായത്തിൽ തന്നെ ചിത്രകലയുടെ അനന്തവിഹായസിലേക്ക് പ്രതിഭയുടെ സ്ഫുരണങ്ങളുമായി കാലെടുത്ത് വെച്ച, ഓരോ വാക്കിലും പ്രവൃത്തിയിലും നിഗൂഢത ഒളിപ്പിച്ച് വെച്ച,ജീവിതത്തിലെ അതിസങ്കീര്‍ണ ഭാവങ്ങളെയും യാഥാർത്ഥ്യങ്ങളേയും രചനകളിലാവാഹിച്ച ചിത്രകാരൻ സാല്‍വദോര്‍ ഡെമിങ്ങോ ഫെലിപ് ജക്വിന്റോ ദാലി ഇ ഡൊമെനെച് എന്ന സാല്‍വദോര്‍ദാലി 1904 ൽ ഇതേ ദിനത്തിലാണ് സ്‌പെയിനിലെ ഫിഗ്വെറിസില്‍ ജനിച്ചത്.അമ്മയുടെ പ്രോത്സാഹനമായിരുന്നു ദാലിയുടെ കരുത്ത്. ദാലി ജനിക്കുന്നതിന് ഒമ്പത് മാസം മുമ്പേ മരിച്ച ജ്യേഷ്ഠന്റെ പേരും സാൽവദോർ എന്നായിരുന്നു.അഞ്ചാം വയസിൽ ജ്യേഷ്ഠന്റെ കുഴിമാടത്തിനരികെ ദാലിയെ കൊണ്ടുപോയി അമ്മ പറഞ്ഞു"  നീ നിന്റെ ജ്യേഷ്ഠൻറെ പുനർജന്മമാണ്". ഈ വാക്കുകൾ ദാലിയെ ആഴത്തിൽ സ്പർശിക്കുകയും ജീവിതാവസാനം വരെ ദാലി ആ വിശ്വാസം പുലർത്തുകയും ചെയ്തു. സ്കൂൾ വിദ്യാഭ്യാസ ശേഷം ആർട്ട് സ്കൂളിൽ എത്തിയ ദാലിയെ രണ്ട് തവണ സ്കൂളിൽ നിന്നും പുറത്താക്കി.ആദ്യ തവണ ഒരു ഉപരോധത്തിന്റെ പേരിലായിരുന്നു. 1926 ൽ പരീക്ഷയ്ക്ക് തൊട്ട് മുമ്പ് സ്കൂളിൽ നിന്നും പുറത്താക്കി.വാചാ പരീക്ഷയിൽ പങ്കെടുക്കുന്നതിൽ നിന്ന് വിസമ്മതിച്ച് ദാലി പറഞ്ഞു" എന്നോട് ചോദ്യം ചോദിക്കാനിരിക്കുന്ന മൂന്ന് പ്രൊഫസർ മാരേക്കാൾ ബുദ്ധിമാൻ ഞാൻ തന്നെയാണ്. അതിനാൽ തന്നെ എന്നോട് ചോദ്യം ചോദിക്കാൻ അവർ അർഹരല്ല". സ്കൂളിൽ നിന്ന് പുറത്താക്കപ്പെട്ട് പാരീസിലെത്തിയ ദാലി ലോകത്തിലെ പ്രതിഭാശാലികളായ ചിത്രകാരന്മാരുടെ കൂട്ടത്തിലേക്ക് മാറുകയായിരുന്നു. 1931 ൽ തന്റെ ഇരുപത്തിയേഴാം വയസിൽ ,ഐൻസ്റ്റൈന്റെ ആപേക്ഷികതാ സിദ്ധാന്തത്തേയും ഫ്രോയ്ഡിന്റെ സ്വപ്ന വ്യാഖ്യാനത്തേയും ആരാധിച്ച സൽവദോർ ദാലി, പ്രതീകാത്മകതയുടെ അന്നോളം കാണാത്ത ഭാവതലങ്ങൾ ക്യാൻവാസിലേക്കാവാഹിച്ച പെർസിസ്റ്റൻസ് ഓഫ് മെമ്മറി എന്ന വിഖ്യാത ചിത്രം വരച്ചു. വിവാദങ്ങളുടെ സഹയാത്രികനായിരുന്ന അദ്ദേഹത്തിന്റെ രചനാശൈലി, വിചിത്രമായ ഉൻമാദം തുളുമ്പിയ സ്വഭാവം, ബുദ്ധിജീവിയായി അംഗീകരിക്കപ്പെടുവാനുള്ള ത്വര, വസ്ത്രധാരണം, കുടുംബജീവിതം എല്ലാം വിമര്‍ശകര്‍ക്ക് വിരുന്നൊരുക്കി. ഏറെ വിഖ്യാതമായ , ക്ലോക്കിലെ 10.10 നെ അനുസ്മരിപ്പിക്കുന്ന അദ്ദേഹത്തിന്റെ പിരിയൻ മീശ അന്യഗ്രഹ ജീവികളിൽ നിന്നും സിഗ്നൽ പിടിച്ച് പറ്റാൻ കഴിയുന്ന ആന്റിനയാണെന്ന വിശ്വാസം ചിലരെങ്കിലും പുലർത്തിയിരുന്നു. അദ്ദേഹത്തിന്റെ കൂടെ നിത്യവും കണ്ടിരുന്ന ബബൗ എന്ന കൊളംബിയൻ ഓസിലോട്ട് കാഴ്ചക്കാരിൽ ഒരേ സമയം കൗതുകവും ഭയവും ഉണ്ടാക്കിയിരുന്നു. പെറുവിലെ ആദിവാസി വർഗ്ഗമായ മോഷെ ഗോത്രം ദൈവത്തെ പോലെ ആരാധിക്കുന്ന, പൂച്ചയിൽ നിന്ന് ആരംഭിച്ചുവെങ്കിലും പുള്ളിപ്പുലിയിൽ എത്താതെ പോയ കുള്ളൻ പുലിയാണ് ഓസിലോട്ട്. തന്റെ അടുത്ത സുഹൃത്തായ പോൾ എല്യൂർവിന്റെ ഭാര്യയും തന്നെക്കാൾ ഏറെ പ്രായം കൂടുതലുമുള്ള ഗലയെ വിവാഹം ചെയ്തതും വിമർശനങ്ങൾക്കിടയാക്കി. പണത്തെ ഏറെ സ്നേഹിച്ച ദാലി , ചുപ ചുപ്സ് ലോലിപോപ്പിന്റെ ലോഗോ ഡിസൈൻ ചെയ്തു. ആഭരണ ഡിസൈനർ, വോഗ് പോലുള്ള മാസികയുടെ കവർ ഡിസൈനർ, ലൂയി ബനുവൽ, ഹിച്കോക്ക്, വാൾട്ട് ഡിസ്നി തുടങ്ങിയവരുടെ കൂടെ സിനിമ സംരഭങ്ങൾ, ഫാഷൻ ഡിസൈനിംഗ് തുടങ്ങിയ നിരവധി മേഖലകളിൽ കൈവച്ച ദാലി 1944ൽ ഹിഡൻ ഫേസസ് എന്ന നോവലും രചിച്ചു. കൂട്ടുകാർ അദ്ദേഹത്തെ Avida Dollars എന്ന് വിളിച്ചിരുന്നു.ഭക്ഷണത്തോട് പ്രത്യേക താൽപര്യമുണ്ടായിരുന്ന ദാലി കടുത്ത ചീരവിരോധിയായിരുന്നു.അതിന് ദാലി പറഞ്ഞ കാരണം വളരെ രസകരമാണ് സ്വാതന്ത്ര്യംപോലെ സ്വന്തമായ ഒരു രൂപമില്ലാത്ത വസ്തുവാണ് ചീര എന്ന്.1973ല്‍ ദാലിയും ഭാര്യ ഗാലയും ചേര്‍ന്ന് തയാറാക്കിയ പാചകപുസ്തകമാണ് ‘ലെ ഡൈനേഴ്സ് ദ ഗാല.12 അധ്യായങ്ങളിലായി, 136 റസിപ്പിയാണ് ഈ പുസ്തകത്തിൽ പ്രതിപാദിച്ചിരിക്കുന്നത്.Thousand year old eggs,Frog pasties,Veal cutlet stuffed with snails,Toffee with pine cones തുടങ്ങിയവ ഇതിൽ ചിലതാണ്. Wines of gala എന്ന കൃതിയും ഇദ്ദേഹം രചിച്ചു. റസ്റ്ററന്റുകളിൽ പോയി ഭക്ഷണം കഴിച്ച് പണം കൊടുക്കാതെ ചിത്രം വരച്ച് നൽകുന്ന ശീലം അദ്ദേഹത്തിനുണ്ടായിരുന്നു. സ്വപ്നങ്ങൾ കാണുവാൻ എന്നും പ്രചോദിപ്പിച്ച ദാലി പറഞ്ഞു" At the age of six I wanted to be a cook. At seven I wanted to be Napoleon. And my ambition has been growing steadily ever since." എന്നും ആഗ്രഹങ്ങളുമായി നടന്ന അദ്ദേഹത്തിന്റെ വാക്കുകൾ പലർക്കും പ്രചോദനമായി മാറിയിരുന്നു. ഒരിക്കൽ പറഞ്ഞു ആഗ്രഹങ്ങളില്ലാതെ ബുദ്ധി മാത്രം ഉള്ളത് ചിറകില്ലാത്ത പക്ഷിക്ക് തുല്യമാണ്.1982 ജൂണിൽ ഭാര്യ ഗലയുടെ മരണം അദ്ദേഹത്തെ നിരാശാ ബോധത്തിലേക്ക് തള്ളിയിട്ടു. താൻ ജനിച്ച നഗരത്തിൽ ദാലി തന്റേതായ ഒരു മ്യൂസിയം പണിതു. 1989 ജനുവരി 23 ന്,  ഒരു മനുഷ്യന് എത്രമാത്രം വിചിത്രമായും സാഹസികമായും സുന്ദരമായും ജീവിക്കാമെന്നു ലോകത്തിനു കാണിച്ചുകൊടുത്ത ആ അപൂര്‍വ കലാപ്രതിഭ ഈ ലോകത്തോട് വിട പറഞ്ഞു. അദ്ദേഹത്തെ അദ്ദേഹം തന്നെ നിർമ്മിച്ച മ്യൂസിയത്തിൽ അടക്കം ചെയ്തു.ഓരോ വർഷവും ഒരു മില്യണോളം ആൾക്കാർ ഇവിടം സന്ദർശിക്കുന്നു.
ഞാൻ ഒരു സറിയലിസ്റ്റാണ്, അതാണ് ഞാനും മറ്റ് സറിയലിസ്റ്റുകളും തമ്മിലുള്ള വ്യത്യാസമെന്ന് ആത്മവിശ്വാസത്തോടെ കുറിച്ച ദാലി പറഞ്ഞു " ഒരു ചിത്രകാരന് ലഭിക്കാവുന്ന രണ്ട് മികച്ച ഭാഗ്യങ്ങളിൽ ഒന്ന് സ്പെയിൻകാരനായി ജനിക്കുക എന്നതാണ് , മറ്റൊന്ന് ദാലി എന്ന ചിത്രകാരൻ ആയിത്തീരുക എന്നതും ഇത്  രണ്ടും എനിക്ക് ലഭിച്ചിട്ടുണ്ട്".സറിയലിസ്റ്റ് ആയിരുന്നുവെങ്കിലും  ഹിറ്റ്ലറെ സ്നേഹിച്ചിരുന്ന, പുൽച്ചാടികളെ ഭയന്നിരുന്ന, തന്റെ പ്രവർത്തികളിൽ സംതൃപ്തനായിരുന്ന സാൽവദോർ ദാലി ഒരിക്കൽ പറഞ്ഞു "There are some days when I think I'm going to die from an overdose of satisfaction." സമൂഹത്തിന് മുന്നിൽ ഭ്രാന്തവും വൈചിത്ര്യവുമായ ജീവിതം നയിച്ചിരുന്ന, തന്റെ കഴിവിനെ പൂർണ്ണമായ തോതിൽ പ്രയോജനപ്പെടുത്തുവാനും ആത്മവിശ്വാസത്തിന്റെ ഔന്നത്യം ലോകത്തെ കാണിക്കാനും ശ്രമിച്ചിരുന്ന ദാലിയിൽ ആരും ഒരിക്കലും ആരോപിക്കാത്ത കുറ്റം 'സാധാരണത്വം' മാത്രമായിരുന്നു.

            # jitheshmaniyat@gmail.com

ബ്രിട്ടീഷ് പ്രധാനമന്ത്രിയായിരുന്ന  'ചിത്രകാരൻ ഡേവിഡ് വിന്ററി' നെയറിയാമോ.....

    മെയ് 10. രണ്ടാം ലോകമഹായുദ്ധത്തിൽ സഖ്യകക്ഷികളെ വിജയത്തിലേക്ക് നയിച്ചവരിൽ ഒരാളായ, സാഹിത്യ നൊബേൽ സമ്മാനം നേടിയ ആദ്യത്തെ പ്രധാനമന്ത്രിയായ ,വിജയം ലോകത്തെ അറിയിക്കാൻ ഭാഷ വേണ്ട രണ്ട് വിരലുകൾ മാത്രം മതി എന്ന് സ്വ  ലോകത്തെ പഠിപ്പിച്ച , വിൻസ്റ്റൺ ചർച്ചിൽ ആദ്യമായി
ബ്രിട്ടീഷ് പ്രധാനമന്ത്രി പദത്തിൽ എത്തിയത് 1940 ൽ ഇതേ ദിവസമാണ്. 1874 നവംബർ 30 ന് ബ്രിട്ടീഷ് പാർലിമെന്റംഗമായിരുന്ന റാൻഡോൾഫ് പ്രഭുവിന്റേയും അമേരിക്കക്കാരിയായ ജന്നി ജറോമിന്റെയും മകനായി വിൻസ്റ്റൺ ലിയനാർഡ് സ്പെൻസർ ചർച്ചിൽ എന്ന വിൻസ്റ്റൺ ചർച്ചിൽ ജനിച്ചു.സ്കൂൾ വിദ്യാഭ്യാസ കാലത്ത് ശരാശരിയിലും താഴ്ന്ന വിദ്യാർത്ഥിയായിരുന്നു ചർച്ചിൽ.ചരിത്രത്തിലും ഇംഗ്ലീഷിലുമൊഴികെ മറ്റ് വിഷയങ്ങളിൽ പരാജയമായിരുന്ന ചർച്ചിൽ സ്കൂളിൽ കൃത്യത പാലിക്കാത്ത വിദ്യാർത്ഥിയായിരുന്നു. പഠനത്തിൽ താഴ്ന്ന നിലവാരം ആയതിനാൽ തന്റെ മകൻ ഒരു മണ്ടനായിപ്പോയല്ലോ എന്ന് ചർച്ചിലിന്റെ പിതാവ് പരിതപിച്ചിരുന്നു.ചെറുപ്പത്തിൽ അസുഖബാധിതനും ശബ്ദത്തിൽ ഇടർച്ചയും വിക്കും ഉള്ള ആളായിരുന്നു ചർച്ചിൽ. ഒരു വിധം സ്കൂൾ പഠനം പൂർത്തിയാക്കിയ ചർച്ചിൽ, റോയൽ മിലിട്ടറി കോളേജിലെ പ്രവേശനത്തിനായി ശ്രമിച്ച് ആദ്യ രണ്ട് തവണയും പരാജയപ്പെട്ടെങ്കിലും പിൻമാറാൻ തയ്യാറാകാത്ത അദ്ദേഹം മൂന്നാം തവണ കോളേജ് പ്രവേശനം സ്വന്തമാക്കി. കഠിനാധ്വാനം ചർച്ചിലിനെ മാറ്റുകയായിരുന്നു. സ്കൂൾ- കോളേജ് പഠനകാലമല്ല ഒരു വ്യക്തിയെ മഹാനാക്കുന്നത് എന്നതിന്റെ ഉത്തമ ഉദാഹരണമായിരുന്നു ചർച്ചിലിന്റെ ജീവിതം.സൈന്യത്തിലെത്തിയ ചർച്ചിൽ പത്രപ്രവർത്തകനായും തിളങ്ങി. 1899ൽ  ബോവർ യുദ്ധവുമായി ബന്ധപ്പെട്ട് ദക്ഷിണാഫ്രിക്കയിലെത്തിയ  ചർച്ചിൽ അവിടെ യുദ്ധത്തടവുകാരനായി.തടങ്കൽ പ്പാളയത്തിൽ നിന്നും അതിസാഹസികമായി രക്ഷപ്പെട്ട് ബ്രിട്ടണിലെ വീര പുരുഷനായ ചർച്ചിൽ തുടർന്ന് രാഷട്രീയ ജീവിതത്തിൽ സജീവമായി. യാഥാസ്ഥിതിക കക്ഷി സ്ഥാനാർത്ഥിയായി ഇരുപത്തിയഞ്ചാം വയസിൽ ബ്രിട്ടീഷ് പാർലിമെന്റിലെത്തിയ ചർച്ചിൽ 1904 ൽ ലിബറൽ പാർട്ടിയിലെത്തി. ഒന്നാം ലോക മഹായുദ്ധത്തിൽ സൈനിക വേഷമണിഞ്ഞ ചർച്ചിൽ 1924ൽ ലിബറൽ പാർട്ടി വിട്ട് വീണ്ടും യാഥാസ്ഥിതിക പാർട്ടിയിലെത്തി.രണ്ടാം ലോക മഹായുദ്ധം ആരംഭിക്കുന്നു. ഇത്രയും നിർണായകമായ വേളയിൽ 1940 മെയ് 10ന് ബ്രിട്ടന്റെ പ്രധാനമന്ത്രിയായി ചർച്ചിൽ അധികാരത്തിലെത്തി. രക്തവും കണ്ണീരും കഠിനാധ്വാനവും വിയർപ്പുമല്ലാതെ ബ്രിട്ടീഷ് ജനതയ്ക്കായ് തനിക്ക് ഒന്നും വാഗ്ദാനം  ചെയ്യാനില്ല എന്ന പ്രസംഗത്തിലൂടെ അദ്ദേഹം ആ  ജനതയെ കൈയിലെടുത്തു. തന്റെ പോരായ്മകൾ ജീവിതത്തിൽ ഒരു തടസ്സമാകരുത് എന്ന് ദൃഡനിശ്ചയം ചെയ്ത് വിക്കിനേയും ഇടർച്ചയേയും കഠിന പരിശ്രമത്തിലൂടെ മറികടന്ന് ലോകം ശ്രദ്ധിച്ച പ്രാസംഗികനാവാൻ ചർച്ചിലിന് സാധിച്ചു. മഹാത്മാഗാന്ധിയേയും അദ്ദേഹത്തിന്റെ നയങ്ങളേയും വെറുപ്പിന്റെ ഭാഷയിൽ പ്രതിരോധിച്ച, മഹാത്മജിയെ അർധനഗ്നനായ ഫക്കീർ എന്ന് വിളിച്ച  ചർച്ചിൽ ഇന്ത്യക്കാർ സംസ്കാരമില്ലാത്ത ജനതയാണെന്നും ഇന്ത്യ ബ്രിട്ടീഷുകാരുടേത് മാത്രമായിരിക്കണമെന്ന നിലപാടും ആവർത്തിച്ച് കൊണ്ട് സാമ്രാജ്യത്വ വാദിയുടെ മുഖം പല തവണ അദ്ദേഹം കാണിച്ചു. യുദ്ധത്തിൽ ബ്രിട്ടണെ വിജയത്തിലേക്ക് നയിച്ചെങ്കിലും 1945 ജൂലൈയിൽ നടന്ന പൊതു തെരഞ്ഞെടുപ്പിൽ ചർച്ചിൽ പരാജയപ്പെട്ടു. അഞ്ഞൂറോളം ചിത്രങ്ങൾ വരച്ച വിൻസ്റ്റൺ ചർച്ചിൽ 1947ൽ തന്റെ രണ്ട് ചിത്രങ്ങൾ ഡേവിഡ് വിൻറർ എന്ന പേരിൽ റോയൽ അക്കാദമിയിലേക്ക് അയച്ചു. ചർച്ചിലിന്റ ചിത്രങ്ങൾ കണ്ട പിക്കാസോ ഇങ്ങിനെ പറഞ്ഞു.. ഇദ്ദേഹം ചിത്രരചനയെ ഒരു പ്രൊഫഷൻ ആയി തെരഞ്ഞെടുത്തുവെങ്കിൽ അതിലൂടെ തന്നെ മികച്ച ജീവിതം നയിക്കാൻ തീർച്ചയായും കഴിയുമായിരുന്നു.1951 ൽ വീണ്ടും പ്രധാനമന്ത്രിയായ ചർച്ചിൽ 1959 വരെ പാർലിമെന്റംഗമായി തുടർന്നു.മികച്ച വായനക്കാരനായ ചർച്ചിൽ മഹാന്മാരുടെ ഉദ്ധരണികൾ ശേഖരിക്കുന്ന ശീലത്തിനുടമയായിരുന്നു. പലരും ഇന്നും ഉദ്ധരിക്കുന്ന പല വാചകങ്ങൾക്കുമുടമയായ ചർച്ചിൽ തന്റെ മൈ ഏർലി ലൈഫ് എന്ന പുസ്തകത്തിൽ ഇങ്ങിനെ കുറിച്ചു"It is a good thing for an uneducated man to read books of quotations . The quotations when engraved upon the memory give you good thoughts". തന്നിലെ ശീലങ്ങളെ തുടർച്ചയായ പരിശീലനത്തിലൂടെ മാറ്റിയെടുത്ത് ആത്മ വിശ്വാസത്തെ ജീവിത വിജയത്തിനുള്ള മൂലധനമാക്കിയ ആധുനിക ബ്രിട്ടന്റെ ചരിത്രത്തിലെ മായ്ക്കാനാവാത്ത അധ്യായങ്ങളിലൊന്നായ വിൻസ്റ്റൺ ചർച്ചിൽ 1965 ജനുവരി 24 ന് മരണത്തിന് കീഴടങ്ങി. ജീവിതത്തിൽ എന്നും റിസ്ക് ഏറ്റെടുക്കാൻ തയ്യാറായിരുന്ന കനത്ത ആപത് ഘട്ടത്തിൽ ഒരു ജനതക്ക് ആത്മവീര്യം പകർന്ന് നൽകിയ ചർച്ചിലിന്റെ വാക്കുകൾ വിജയം ആഗ്രഹിക്കുന്നവർക്ക് വഴി കാട്ടിയാവുന്നു. അദ്ദേഹം പറഞ്ഞു" You must put your head into the lion’s mouth if the per­for­mance is to be a suc­cess.” 

            jitheshmaniyat@gmail.com

ജന്മദിനമറിയാത്ത നംഗ്യാൽ വാങ്ദി

         മെയ് 9.. ടിബറ്റിൽ ചോമോലുങ്മ എന്നും നേപ്പാളിൽ സാഗർ മാത എന്നും വിളിക്കപ്പെടുന്ന ലോകത്തിലെ ഉയരം കൂടിയ കൊടുമുടി കീഴടക്കിയതിലൂടെ മാനവ സമൂഹത്തിന്റെ ഹൃദയം കീഴടക്കിയ ഹിമക്കടുവ ഷേർപ്പ ടെൻസിംഗ് നോർഗെ 1986 ലെ ഇതേ ദിനം ഡാർജിലിങ്ങിൽ വച്ച് മരണത്തിന് കീഴടങ്ങി. നേപ്പാളിലെ ഖുംബു പ്രദേശത്തെ ഒരു സാധാരണ ഷെർപ്പ കുടുംബത്തിൽ 1914 മെയ് മാസത്തിലാണ് നാംഗ്യാൽ വാങ്ദി എന്ന പേരിൽ നോർഗെ ജനിച്ചത്. ഒരു ലാമാ നേതാവിൻറെ നിർദ്ദേശപ്രകാരമാണ് 'സമ്പന്നനും ഭാഗ്യവാനും ആയ മതവിശ്വാസി' എന്ന അർത്ഥം വരുന്ന ടെൻസിംഗ് നോർഗേ എന്ന പേര് മാതാപിതാക്കൾ കുട്ടിക്ക് മാറ്റി നൽകിയത്.രണ്ടുതവണ വീട് വിട്ടുപോയ അദ്ദേഹത്തെ വീട്ടുകാർ ചേർന്ന് ഒരു ബുദ്ധമത സന്ന്യാസിയാക്കുവാൻ വേണ്ടി തെങ്ബോച്ചെ ബുദ്ധവിഹാരം കൊണ്ടു ചെന്നാക്കി.സന്യാസജീവിതം തൻറെ വഴിയല്ല എന്ന് മനസ്സിലാക്കിയ നോർഗെ പത്തൊമ്പതാം വയസ്സിൽ ഡാർജിലിങ്ങിൽ എത്തിപ്പെട്ടു. ഷേർപ്പ ആയതിനാൽ തന്നെ , പർവ്വതാരോഹണം മനസ്സിൽ കൊണ്ടുനടന്ന ടെൻസിംഗ് നോർഗെ പർവ്വതാരോഹകരുടെ കൂടെ ഭാരം ചുമക്കുന്ന പോർട്ടർ ആയി മാറാൻ ശ്രമിച്ചു.1935 മെയ് 21ന് എറിക് ഷിപ്ടൻറെ കൂടെയായിരുന്നു ആദ്യ എവറസ്റ്റ് ദൗത്യം. ആദ്യ ദൗത്യം പരാജയമായി മാറി. തൊട്ടടുത്ത വർഷം ഇംഗ്ലീഷ് പർവ്വതാരോഹകനായ  ജോൺ മോറിസിൻറെ കൂടെ എവറസ്റ്റ് കീഴടക്കാനുള്ള ദൗത്യത്തിൽ പങ്കാളിയായി അതും പരാജയമായിരുന്നു. 1947 ൽ കനേഡിയൻ പർവ്വതാരോഹകനായ ഏൾ ഡോൺ മാനോടൊപ്പം നടത്തിയ ദൗത്യവും പരാജയത്തിൽ കലാശിച്ചു. എന്നാൽ അതേ വർഷം തന്നെ ഒരു സ്വിസ് സംഘത്തോടൊപ്പം കേദാർനാഥ് കൊടുമുടി കീഴടക്കാൻ ടെൻസിങ് നോർഗെ സാധിച്ചു. 1952 എവറസ്റ്റ് ദൗത്യത്തിൽ ടെൻസിങ് നോർഗെയുടെ ജീവിതത്തിലെ പ്രധാനപ്പെട്ട ഒരു വർഷമായിരുന്നു. ആ വർഷം സ്വിസ് പർവ്വതാരോഹകനായ റെയ്മണ്ട് ലാംബർട്ടിനൊപ്പം നേപ്പാൾ ഭാഗത്തുകൂടി ഒരു പുതിയ പാത കണ്ടെത്താനും അതിലൂടെ കയറി എവറസ്റ്റിന്റെ 8595 മീറ്റർ ഉയരത്തിൽ എത്താനും ആദ്യശ്രമത്തിൽ സാധിച്ചു.രണ്ടാം ശ്രമത്തിൽ മോശം കാലാവസ്ഥ കാരണം          8100 മീറ്റർ താണ്ടാനേ സാധിച്ചുള്ളൂ. ഈ പരിചയസമ്പത്തിന്റെ വെളിച്ചത്തിൽ 1953 ൽകേണൽ ജോൺ ഹണ്ടിൻറെ നേതൃത്വത്തിൽ നാനൂറോളം പേർ ഉൾപ്പെട്ട ഒരു വലിയ പര്യവേഷണ സംഘത്തിന്റെ ഭാഗമാകാൻ നോർഗെയ്ക്ക് സാധിച്ചു.പര്യവേക്ഷണ യാത്രാവേളയിൽ ഒരു വേള തെന്നി വീഴാൻ പോയ എഡ്മണ്ട് ഹിലറിയെ വീഴ്ചയിൽ നിന്നും കൈപിടിച്ച് രക്ഷിക്കാൻ ടെൻസിങ്ങിന് സാധിച്ചു.രണ്ട് ഹൃദയങ്ങൾ തമ്മിൽ അടുത്തു.സംഘത്തിലെ ടോം ബർഡില്ലനും ചാൾസ് ഇവാൻസും ചേർന്ന്  ദൗത്യം ആരംഭിച്ചു .ഇവാൻസിന്റെ ഓക്സിജൻ കിറ്റിലെ പ്രശ്നങ്ങൾ മൂലം 8748 മീറ്റർ ഉയരത്തിൽ വെച്ച്, അതും കൊടുമുടിക്ക് ഏതാനും മീറ്റർ അകലെ വെച്ച് ദൗത്യമുപേക്ഷിച്ച് അവർ തിരികെയിറങ്ങി. തുടർന്ന് ടെൻസിങ്ങും ഹിലറിയും ദൗത്യം ആരംഭിച്ചു.1953 മെയ് 29 രാവിലെ 11.30 ന് മനുഷ്യന്റെ ഇച്ഛാശക്തിക്ക് മുന്നിൽ ലോകത്തെ ഏറ്റവും ഉയരം കൂടിയ കൊടുമുടി കീഴടങ്ങി. പതിനഞ്ച് മിനിട്ട് അവർ എവറസ്റ്റിന് മുകളിൽ ചിലവഴിച്ചു.ഹിലറി തന്റെ ക്യാമറയിൽ നോർഗെ കൊടുമുടിക്ക് മുകളിൽ മഞ്ഞ് കോടാലി പിടിച്ച് നിൽക്കുന്ന പ്രശസ്തമായ ചിത്രം പകർത്തി. നോർഗെയ്ക്ക് ക്യാമറ കൈകാര്യം ചെയ്യാനറിയാത്തതിനാലോ മറ്റോ ഹിലറിയുടെ ചിത്രം ലഭിച്ചില്ല. നോർഗെ തന്റെ വിശ്വാസ പ്രകാരം ചോമോലുങ്മയ്ക്ക് ഭക്ഷണം സമർപ്പിച്ചു.സന്തോഷസൂചകമായി അവർ അവിടെ വെച്ച് ഒരു മിന്റ് കേക്ക് ഭക്ഷിച്ചു. സ്വപ്നപൂർത്തീകരണത്തിന് ശേഷം അവർ മെല്ലെ തിരിച്ചിറങ്ങി. സംഘത്തിലെ ജോർജ്ജ് ലോവിനെയാണ് അവർ ആദ്യം കണ്ടത്. ഹിലറി ലോവിനോട് പറഞ്ഞു "Well George, we knocked the bastard off". തിരിച്ചെത്തിയ ഇരുവരോടും ആദ്യം ചോദിച്ച ചോദ്യം ആരാണ് ആദ്യം കീഴടക്കിയത് എന്നായിരുന്നു. രണ്ട് പേരും ഒരുമിച്ച് എന്ന് മറുപടി. ചോദിച്ചവർക്ക് തൃപ്തി വന്നില്ല. അവരെ തൃപതിപ്പെടുത്താൻ ടീം ലീഡറായ കേണൽ ഹണ്ട് പറഞ്ഞു"They reached it together,as a team". നോർഗെ തന്റെ മാൻ ഓഫ് എവറസ്റ്റ് (ടൈഗർ ഓഫ് ദ് സ്നോ) എന്ന ആത്മകഥയിൽ ഹിലറിയാണ് ആദ്യം കയറിയതെന്ന് പറയുന്നുവെങ്കിലും രണ്ട് പേരും പരസ്പരബഹുമാനം കാത്ത് സൂക്ഷിച്ച് നല്ല സുഹൃത്തുക്കളായി അവസാനം വരെയും തുടർന്നു.തന്റെ ജീവിതത്തിലെ ഏറ്റവും മഹത്തായ കാര്യം നടന്ന മെയ് 29 നെ തന്റെ ജന്മദിനമായി ആഘോഷിക്കാൻ നോർഗെ തീരുമാനിച്ചു.അങ്ങിനെ എവറസ്റ്റ് ആരോഹണ ദിനം നോർഗെയുടെ ജന്മദിനവുമായി. ഹിലറിക്കും ജോൺ ഹണ്ടിനും പ്രഭു പദവി ലഭിച്ചു. എന്നാൽ ചില രാഷട്രീയ ഇടപെടലുകൾ കാരണം നോർഗെയ്ക്ക് ഹോണററി പദവി മാത്രം ലഭിച്ചു. പല പുരസ്കാരങ്ങളും ഇദ്ദേഹത്തെ തേടിയെത്തി.22 വർഷം ഹിമാലയൻ മൗണ്ട നീയറിങ് ഇൻസ്റ്റിറ്റ്യൂട്ടിന്റെ ഫീൽഡ് ഡയറക്ടറായിരുന്ന നോർഗെയുടെ പേരിൽ നേപ്പാളിൽ ഒരു കൊടുമുടിയും വിമാനത്താവളവുമുണ്ട്. ടൈം മാഗസിൻ ഇരുപതാം നൂറ്റാണ്ടിൽ ലോകത്തെ സ്വാധീനിച്ച  നൂറ് വ്യക്തികളിലൊരാളായി തെരഞ്ഞെടുത്ത ടെൻസിങ് നോർഗെയുടെ പേര് 2015ൽ നാസ പ്ലൂട്ടോയിലെ ഒരു മഞ്ഞ് മലയ്ക്ക് നൽകി ആദരിച്ചു.പരാജയങ്ങളേറെ ഏറ്റുവാങ്ങിയ നോർഗെ തന്റെ ആത്മ കഥയിൽ കുറിച്ചു.."പർവ്വതാരോഹകരുടെ ചുമട്ട് തൊഴിലാളിയായിരുന്ന ഞാൻ കോട്ടും മെഡലുകളുമണിഞ്ഞ് വിമാനത്തിൽ സഞ്ചരിക്കുന്നത് യാദൃച്ഛികതയാവാം". എങ്കിലും അതിന് പിന്നിൽ തോൽക്കാൻ മനസില്ലാത്ത ഒരു മനുഷ്യന്റെ നിശ്ചയ ദാർഡ്യമുണ്ട്. 1953 ലെ വലിയ പര്യവേക്ഷണ സംഘത്തിലെ യാത്രയിൽ ചില കശപിശകൾ ഉണ്ടാവുക സ്വാഭാവികമായിരുന്നു. ഈ സമയത്ത് അദ്ദേഹം പറഞ്ഞു ..തീരെച്ചെറിയ കാര്യങ്ങളെച്ചൊല്ലി നമുക്ക് വഴക്കടിക്കാതിരിക്കാം.നമുക്കൊരു പർവതം കീഴടക്കാനുണ്ട് .ചിന്ത അതിലേക്ക് കേന്ദ്രീകരിക്കാൻ നമുക്ക് സാധിക്കണം. നമുക്ക് മുന്നിലുള്ള ലക്ഷ്യത്തെ കുറിച്ച് മാത്രം നമുക്ക് ചിന്തിക്കാം.കൊടുമുടി കയറാനൊരുങ്ങുന്നവർ ചെറു കുന്നുകളെക്കുറിച്ചാലോചിക്കരുത്. വലിയ കാര്യങ്ങൾ ചെയ്യണമെന്നാഗ്രഹിക്കുന്നവർക്ക് അതിനനുസരിച്ചുള്ള വലിയ മനസ്സും വേണം". ആറ് തവണ പരാജയപ്പെട്ടിട്ടും ഒരിക്കലെങ്കിലും വിജയം തന്റെ കൂടെയുണ്ടാവും എന്ന നിശ്ചയദാർഡ്യവുമായി മുന്നോട്ട് പോയ ടെൻസിങ്ങ് നോർഗെ യുടെ ജീവിതം ഏത് പ്രതിസന്ധിയും മറികടക്കാനും ലക്ഷ്യത്തിലേക്ക് കൃത്യമായി മുന്നേറാനും നിശ്ചയദാർഡ്യവും അത് സ്വന്തമാക്കാനുള്ള മനസുമുള്ള ആർക്കും സാധിക്കും എന്നതിന്റെ ഉത്തമ ഉദാഹരണമാണ്. കൊടുമുടിയല്ല തണ്ടേണ്ടത് അതിനേക്കാളേറെ മറികടക്കേണ്ടത് അസ്ഥിരമായ നമ്മുടെ മനസിനേയാണ്..
       
        jitheshmaniyat@gmail.com

സോൾഫെറീനോ സൃഷ്ടിച്ച സംഘടനയും പാപ്പരായ സ്ഥാപകനും

        മെയ് 8.. ലോക റെഡ് ക്രോസ് റെഡ്ക്രസന്റ് ദിനം. സംഘടനയ്ക്ക് വിത്ത് പാകിയ മനുഷ്യ സ്നേഹിയുടെ ജന്മദിനം.1828 മെയ് 8നാണ്, ലോകത്തിന്റെ വേദന തന്റെത് കൂടിയാണ് എന്ന ബോധത്തോടെ പ്രവർത്തിച്ച, ആദ്യത്തെ സമാധാന നൊബേൽ സമ്മാന ജേതാക്കളിലൊരാളായ, സമ്പന്നതയിൽ നിന്ന് ദാരിദ്യത്തിലേക്ക് എടുത്തെറിയപ്പെട്ട ജീൻ ഹെൻറി ഡ്യുനന്റ് സ്വിറ്റ്സർലാൻറിലെ ജനീവയിൽ ജനിച്ചത്.സമ്പന്ന കുടുംബത്തിൽ ജനിച്ച ഡ്യുനന്റ് സെക്കന്ററി വിദ്യാഭ്യാസം പൂർത്തിയാക്കും മുമ്പേ ജനീവയിലെ ഒരു ബാങ്കിൽ അപ്രൻറിസ് ആയി ജോലിയിൽ കയറി. തുടർന്ന് അൾജീരിയയിൽ ഒരു ഗോതമ്പ് മിൽ ആരംഭിക്കാൻ ശ്രമിച്ചു.പ്രശ്നങ്ങൾ ഉണ്ടായി. ഫ്രഞ്ച് അധീന പ്രദേശമായ അൾജീരിയയിലെ പ്രശ്ന പരിഹാരത്തിനായി ഫ്രഞ്ച് ചക്രവർത്തിയായ നെപ്പോളിയൻ മൂന്നാമനെ കാണാനായി ഡ്യുനന്റ് ശ്രമിച്ചു.ആ സമയത്ത് നെപ്പോളിയൻ മൂന്നിന്റെ ഫ്രഞ്ച് സൈന്യവും വിക്ടർ ഇമ്മാനുവൽ രണ്ടാമന്റെ സാർഡീനിയൻ സേനയും ചേർന്ന് ഫ്രാൻസ് ജോസഫ് ഒന്നിന്റെ ആസ്ട്രിയൻ സേനയ്ക്കെതിരായ സോൾഫെറിനോ യുദ്ധം നടക്കുകയായിരുന്നു. ഡ്യുനന്റ് ആ യുദ്ധത്തിന്റെ ദൃക്സാക്ഷിയായി. ഒറ്റ ദിനം കൊണ്ട് നാൽപ്പതിനായിരം പേർ മരിക്കുകയോ ഗുരുതരമായി പരിക്കേൽക്കുകയോ ചെയ്ത യുദ്ധം. രണ്ടു ഭാഗത്തും വൈദ്യസംഘം ഒന്നും തന്നെ ഉണ്ടായിരുന്നില്ല. ഇത് ശ്രദ്ധയിൽപ്പെട്ട ഡ്യുനന്റ് ചില സന്നദ്ധസേവകരെ സംഘടിപ്പിച്ചുകൊണ്ട് പരിക്കേറ്റവർക്ക് വെള്ളം, ഭക്ഷണം, പരിക്ക് സുഖപ്പെടുത്തൽ, പരിക്കേറ്റവരുടെ വീട്ടിലേക്കുള്ള കത്തയക്കൽ തുടങ്ങിയ സേവനങ്ങളിൽ മുഴുകി . ജനീവയിൽ തിരിച്ചെത്തിയ ഡ്യുനന്റ് 1862 ൽ യുദ്ധമുഖത്ത് തനിക്കുണ്ടായ അനുഭവങ്ങൾ A memory of solferino എന്ന പുസ്തകത്തിൽ രേഖപ്പെടുത്തി. ഈ പുസ്തകത്തിൽ അദ്ദേഹം ചില ചോദ്യങ്ങൾ മുന്നോട്ടുവയ്ക്കുകയും യുദ്ധകാലത്തും സമാധാന കാലത്തും സേവന സന്നദ്ധരായ ആൾക്കാരുടെ ഒരു സന്നദ്ധ സംഘടന രൂപീകരിക്കുക എന്നആശയം മുന്നോട്ട് വെക്കുകയും ചെയ്തു . പ്രസ്തുത പുസ്തകത്തിൽ ക്രിമിയൻ യുദ്ധമുഖത്ത് ഫ്ലോറന്സ് നൈറ്റിംഗേൽ ചെയ്ത കാര്യങ്ങളെ അദ്ദേഹം പ്രകീർത്തിച്ചു. ആ വിളക്കേന്തിയ വനിത പോലും ഡ്യുനന്റ് മുന്നോട്ടുവെച്ച ലോക സംഘടന എന്ന ആശയം , നടപ്പിലാകുന്ന കാര്യമല്ല എന്നാണ് അഭിപ്രായപ്പെട്ടത്. പിന്മാറാൻ ഡ്യുനന്റ് തയ്യാറായിരുന്നില്ല. തൻറെ സ്വകാര്യ ആശയങ്ങളെ  ഒരു ലോക സംഘടന എന്ന രീതിയിലേക്ക് മാറ്റിയെടുക്കാൻ അദ്ദേഹത്തിന് സാധിച്ചു. 1863  ഫെബ്രുവരി 17    ന് ഹെൻറി ഡ്യുനന്റ് ജനീവയിൽ വച്ച് ഗുസ്താവ് മൊയിനിയർ, ഹെൻറി ഡ്യുഫോർ, ലൂയി അപ്പിയ,തിയഡോർ മൗനോയർ എന്നിവരോടൊപ്പം ചേർന്ന് റെഡ്ക്രോസിന്റെ ആദ്യ യോഗം നടത്തി.ഡ്യുനാന്റ് തുടക്കംകുറിച്ച രാജ്യാന്തര റെഡ്ക്രോസ് സൊസൈറ്റി ഇന്ന് 190 രാഷ്ട്രങ്ങളിൽ സന്നദ്ധ പ്രവർത്തനങ്ങളുമായി സജീവമായി പ്രവർത്തിക്കുന്നു. റെഡ് ക്രോസ് സൊസൈറ്റിക്കുള്ള അംഗീകാരമായി മൂന്നു തവണ (1917, 1944, 1963) സമാധാനത്തിനുള്ള നൊബേൽ സമ്മാനം ലഭിച്ചു. പക്ഷെ സ്വകാര്യ ജീവിതത്തിൽ പരാജയങ്ങൾ അദ്ദേഹത്തെ തേടി വരികയായിരുന്നു. കടുത്ത സാമ്പത്തിക ബാധ്യതകൾ ഉണ്ടായതിനെത്തുടർന്ന് 1867 ൽ കോടതി അദ്ദേഹത്തെ പാപ്പരായി പ്രഖ്യാപിച്ചു.ആ കാലഘട്ടത്തിൽ അദ്ദേഹത്തിന് ഏകദേശം ഒരു മില്യൺ സ്വിസ് ഫ്രാങ്കിന്റെ കടം ഉണ്ടായിരുന്നു.ഇതിനെ തുടർന്ന് റെഡ് ക്രോസ് സെക്രട്ടറി സ്ഥാനം രാജി വച്ചു കൊണ്ട് ഒരു കത്ത് അദ്ദേഹം നൽകി.1867 സെപ്തംബർ 8 ന് അദ്ദേഹത്തിന്റെ രാജി അംഗീകരിക്കുകയും സെകട്ടറി സ്ഥാനത്ത് നിന്നും അംഗത്വത്തിൽ നിന്നും പുറത്താക്കുകയും ചെയ്തു. പിന്നീട് ജനീവ വിട്ട് പാരീസിലേക്ക്  എത്തിയ ഡ്യുനൻറിനെ കാത്തിരുന്നത് ഏകാന്തതയും ദാരിദ്യവുമായിരുന്നു. പാരീസിൽ പൊതു ഇടങ്ങളിലെ ബഞ്ചുകളിൽ അദ്ദേഹത്തിന് രാവുകൾ തള്ളി നീക്കേണ്ടി വന്നു. പൊതു മണ്ഡലങ്ങളിൽ നിന്നും അപ്രത്യക്ഷനായ അദ്ദേഹം സ്വിറ്റ്സർലാൻറിലെ ഹെയ്ഡൻ ഗ്രാമത്തിലെ ഒരു സത്രത്തിലെ റൂം നമ്പർ 12 ൽ ആരോരുമറിയാതെ, ആരാലും ശ്രദ്ധിക്കപ്പെടാതെ ജീവിതം തള്ളിനീക്കവേ 1895 ൽ ഒരു പത്രപ്രവർത്തകനായ ജോർജ്ജ് ബോംബർഗറിന്റെ കണ്ണിൽപ്പെട്ടതോടെ വീണ്ടും ലോക ശ്രദ്ധയിലേക്കെത്തി. ചില ഭാഗങ്ങളിൽ നിന്നും സഹായങ്ങൾ എത്തി. ഇതിന്റെയൊക്കെ വെളിച്ചത്തിൽ നൊബേൽ കമ്മറ്റിയുടെ മുന്നിൽ ഇക്കാര്യം എത്തുകയും 1901 ൽ ആദ്യ സമാധാന നൊബേൽ സമ്മാനം ആതുര ശുശ്രൂഷ മേഖലയിൽ പുതിയ മുഖം  നൽകിയ ഹെൻറി ഡ്യുനൻറിന് ഫ്രെഡറിക് പാസിയോടൊപ്പം നൽകുകയും ചെയ്തു. 1910 ൽ ഒക്ടോബർ 30 ന് തന്റെ ആശയത്തെ വളർത്തി വലുതാക്കി എല്ലാ രാജ്യങ്ങളിലേക്കും സമാധാനത്തിന്റെ സന്നദ്ധ സേവകരെ എത്തിച്ച മഹാനായ ആ മനുഷ്യ സ്നേഹി ഹെയ്ഡനിലെ അഭയകേന്ദ്രത്തിലെ ഒറ്റമുറിയിലെ പതിനെട്ട് വർഷത്തെ ഏകാന്ത വാസത്തിന് ശേഷം യുദ്ധമില്ലാത്ത , സമാധാനം മാത്രം നിറഞ്ഞ ലോകത്തിലേക്ക് യാത്രയായി. ലോകത്തെ ഒരു കുടക്കീഴിലാക്കിയ ആ മഹാരഥന് വേണ്ടി പ്രത്യേക മരണാനന്തര ചടങ്ങുകൾ നടന്നില്ല, വിലാപയാത്രകൾ ഉണ്ടായില്ല,അനുശോചന യോഗങ്ങൾ നടന്നില്ല.Rene Sonderegger പ്രസിദ്ധീകരിച്ച  ഡ്യുനൻറിന്റെ കത്തുകളിലൊന്നിൽ അദ്ദേഹം പറഞ്ഞു" ഒരു പട്ടിയുടെ ശവസംസ്കാരമേ ഞാൻ ആഗ്രഹിക്കുന്നുള്ളൂ". മരണശേഷവും അദ്ദേഹം ലോകത്തെ തോൽപ്പിച്ചു. സമ്മാനങ്ങളിൽ നിന്നും ലഭിച്ച തുക അദ്ദേഹം ചെലവാക്കിയില്ല. ഒസ്യത്ത് പ്രകാരം ഒരു ഭാഗം അവസാനകാലം തന്നെ ശുശ്രൂഷിച്ച അഭയകേന്ദ്രത്തിനും ഇനിയും അവിടെ വരാൻ സാധ്യതയുള്ള ദരിദ്രരായവർക്ക് കടക്കാനുള്ള സൗകര്യമൊരുക്കാനും നോർവെയിലേയും സ്വിറ്റ്സർലന്റിലേയും ചില ജനോപകാര സംഘടനകൾക്കും നൽകാൻ അദ്ദേഹം നിർദ്ദേശിച്ചു. ചിലർ അങ്ങിനെയാണ് മരിച്ചാലും അവർ നമ്മെ നന്മ ചെയ്ത് തോൽപ്പിച്ച് കൊണ്ടേയിരിക്കും. ഓരോ വർഷവും വരുന്ന റെഡ് ക്രോസ് ദിനത്തിൽ മാത്രം ഓർക്കേണ്ട പേരല്ല ഹെൻറി ഡ്യുനൻറി ൻറേത്. മനുഷ്യത്വത്തിന്റെ, സമാധാനത്തിന്റെ വിളക്കായ് ആ പേര് എന്നും ജ്വലിച്ച് നിൽക്കും.
        
        jitheshmaniyat@gmail.com

പ്രണയവും നോവലും താണ്ടിയ ദരിദ്രനായ ദാർശനികൻ

      മെയ് അഞ്ച് . 1818 ൽ ഇതേ ദിന ത്തിലാണ് ലോകത്തിലെ തൊഴിലാളി വർഗ്ഗത്തിന്റെ ,പട്ടിണിപ്പാവങ്ങളുടെ ജീവിതത്തിൽ പുതിയ പുലരി സുഷ്ടിക്കാൻ സ്വപനം കണ്ട അതിനെ പ്രവർത്തി പഥത്തിലെത്തിക്കാൻ ശ്രമിച്ച , ലോകം ഇന്നേ വരെ കണ്ട ഏറ്റവും  മികച്ച തത്വ ചിന്ത കരിലൊരാളായ കാൾ മാർക്സ് ജനിച്ചത്. മതം മനുഷ്യനെ മയക്കുന്ന കറുപ്പാണെന്ന് ലോകത്തോട് വിളിച്ച് പറഞ്ഞ, സർവ്വ രാജ്യത്തൊഴിലാളികളോട് സംഘടിക്കുവാൻ ആഹ്വാനം ചെയ്ത് ഭരണ വർഗ്ഗത്തിന്റെ നെഞ്ചിടിപ്പ് കൂട്ടിയ , 1999ൽ ബിബിസി നടത്തിയ നൂറ്റാണ്ടിലെ ഏറ്റവും വലിയ ചിന്തകനായി ലോകം തെരഞ്ഞെടുത്ത കാൾ മാർക്സ്. സ്കൂളിൽ പഠിക്കുമ്പോൾ ഒരു സാധാരണ വിദ്യാർത്ഥിയായി ഒരു കൗമാരക്കാരന്റെ എല്ലാ ചാപല്യങ്ങളും ഉണ്ടായിരുന്ന മാർക്സ് ദുർബലമായ നെഞ്ച് എന്ന കാരണത്താൽ ശാരീരിക സ്ഥിതി മോശമായതിനാലാണ് നിർബന്ധിത സൈനിക സേവനത്തിൽ നിന്ന് ഒഴിവാക്കപ്പെടുന്നത്. പ്രണയം ഒരു വികാരമായി മാർക്സിൽ കുടിയേറിയിരുന്നു. മാർക്സിന്റെ ജീവിതത്തിൽ നിർണായക പങ്കാണ് ഭാര്യയായ ജെന്നിഫാൻ വെസ്റ്റ് ഫാളൻ വഹിച്ചത്.രണ്ട് സാമ്പത്തിക നിലവാരമുള്ള, വ്യത്യസ്ത സമുദായത്തിൽ പെട്ടവർ തമ്മിലുള്ള വിവാഹങ്ങൾ അത്ര സാധാരണമല്ലാത്ത പ്രഷ്യൻ സമൂഹത്തിൽ ഏറെ എതിർപ്പിനെ നേരിട്ടാണ് മാർക്സ് തന്നേക്കാൾ നാല് വയസ് കൂടുതലുള്ള ജന്നിയെ സ്വന്തമാക്കിയത്. എഴുത്തിനെ ഏറെ സ്നേഹിച്ച മാർക്സിന് തന്റെ ജീവിതകാലത്ത് അതിന്റെ നേട്ടങ്ങൾ സ്വന്തമാക്കാൻ സാധിച്ചില്ല. പ്രണയ ഗീതങ്ങൾ രചിച്ച, ചെറു നാടകവും സ്കോർപിയൻ ആൻറ് ഫെലിക്സ് എന്ന ഹ്രസ്വ നോവലും രചിച്ച കാൾ മാർക്സിന്റെ ജീവിതം ദാരിദ്യം നിറഞ്ഞതായിരുന്നു. ദരിദ്രമായ ജീവിത സാഹചര്യം മക്കളുടെ മരണത്തിനും സമ്പന്ന പ്രഭു കുടുംബത്തിൽ ജനിച്ച ഭാര്യയുടെ പട്ടിണിയും ഇടയായിട്ടും തന്റെ തത്വചിന്തകളിൽ നിന്നും കടുകിടാ വ്യതിചലിക്കാനോ മുതലാളിത്ത വ്യവസ്ഥിതിയോട് വിട്ട് വീഴ്ച ചെയ്യാനോ മാർക്സ് സന്നദ്ധനായില്ല. മാർക്സിനെ ലോകം അറിയുന്ന തത്വചിന്തകനാക്കിയതിൽ സുഹൃത്തായ ഏംഗൽസിലുള്ള പങ്ക് വളരെ വലുതാണ്. സാമ്പത്തികമായും ഏംഗൽസ് മാർക്സ് കുടുംബത്തെ സഹായിച്ചിരുന്നു. ഒരിക്കൽ ഏംഗൽസിനെഴുതിയ കത്തിൽ തന്റെ അമ്മ പറഞ്ഞ വാക്കുകൾ ഇങ്ങിനെ കുറിക്കുന്നു..." മൂലധനത്തെ കുറിച്ച് ഒരു പാട് എഴുതിയ നേരം കൊണ്ട് അത് ഉണ്ടാക്കാനുള്ള ബുദ്ധി എന്റെ മകനുണ്ടായിരുന്നെങ്കിൽ". അതെ ലോകം കണ്ട ഏറ്റവും വലിയ ദാർശനികൻ പണം കൊണ്ട് സമ്പന്നനായിരുന്നില്ല.തന്റെ ദർശനങ്ങളെ പണയം വച്ച് സമ്പന്നനാകാൻ അദ്ദേഹത്തിന് കഴിയുമായിരുന്നു. അദ്ദേഹം അതിന് തുനിഞ്ഞില്ല. രാജ്യമില്ലാത്തവനായിരുന്നു മാർക്സ്. പ്രഷ്യയിൽ നിന്ന് പുറത്താക്കപ്പെട്ട് ഫ്രാൻസിലും ബൽജിയത്തിലും പിന്നീട് വീണ്ടും പ്രഷ്യയിലും തുടർന്ന് ഇംഗ്ലണ്ടിലുമെത്തിയ ആ മഹാപ്രതിഭ ഭാര്യയുടെ മരണശേഷം രോഗാതുരനാവുകയും 1883 മാർച്ച് 14 ന് ലോകത്തോട് വിട പറയുകയും ചെയ്തു. ജ്ഞാനപീ0 ജേതാവ് ഒ എൻ വി കുറുപ്പ് എഴുതിയത് പോലെ" ശവകുടീരത്തിൽ നീ ഉറങ്ങുമ്പോഴും ,ഇവിടെ നിൻ വാക്ക് ഉറങ്ങാതിരിക്കുന്നു" ലോകം മാർക്സിനെ വായിച്ച് കൊണ്ടേയിരിക്കുന്നു. അദ്ദേഹത്തിന്റെ ദർശനങ്ങളെ വ്യാഖ്യാനിച്ച് കൊണ്ടേയിരിക്കുന്നു. ഫ്രഞ്ച്  ചിന്തകനായ റെയ്മണ്ട് ആറോൺ ഒരിക്കൽ ഇങ്ങിനെ പറഞ്ഞു" Karl Marx's work can be explained in five minutes, five hours, in five years or in a half century”.
     
      jitheshmaniyat@gmail.com

നഷ്ടപ്പെട്ട കയ്യെഴുത്തുപ്രതിയും  മോഷണം പോയ നൊബേൽ മെഡലും.
മെയ് 7.  ഭാരതീയ സാഹിത്യത്തെ ലോകസാഹിത്യത്തിന്റെ നിറുകയിൽ എത്തിച്ച, ഗുരുദേവ്, കവി ഗുരു ,വിശ്വകവി,എന്നിങ്ങനെയൊക്കെ അറിയപ്പെട്ട, ഇന്ത്യൻ സാഹിത്യ രംഗത്ത് ഏറ്റവുമധികം ആദരിക്കപ്പെടുന്ന മഹാ പ്രതിഭയായ രവീന്ദ്രനാഥാ ടാഗോർ , ബ്രഹ്മസമാജത്തിന്റെ സ്ഥാപകരിലൊരാളായ ദേവേന്ദ്രനാഥ ടാഗോറിന്റെയും ശാരദാ ദേവിയുടെയും 13 മക്കളിൽ ഇളയവനായി 1861 ൽ ഇതേ ദിവസമാണ് കൊൽക്കത്തയിലെ ജറാസങ്കോ ഭവനത്തിൽ ജനിച്ചത്.കവിത രക്തത്തിലലിഞ്ഞു ചേർന്ന ടാഗോർ തന്റെ എട്ടാം വയസ്സിൽ ആണ് ആദ്യത്തെ കവിത എഴുതുന്നത്. പതിനാറാം വയസ്സിൽ ബാനുസിംഹ എന്ന തൂലികാനാമത്തിൽ ബാനു സിംഹ താക്കുറർ പദാബലി എന്ന ആദ്യ കവിതാസമാഹാരം പുറത്തിറക്കി.കവി, സംഗീതജ്ഞൻ, ചിത്രകാരൻ, തത്വചിന്തകൻ, വിദ്യാഭ്യാസ വിചക്ഷണൻ, നോവലിസ്റ്റ് ,നാടകകൃത്ത് ,കഥാകൃത്ത് തുടങ്ങി ടാഗോർ  കൈവെക്കാത്ത മേഖലകൾ ചുരുക്കമാണ്.വാല്മീകി പ്രതിഭ എന്ന നാടകം രചിച്ച് അതിൽ അഭിനയിച്ച ടാഗോർ , നതി ർ പൂജ എന്ന ചിത്രം സംവിധാനം ചെയ്യുകയും ചെയ്തു.2230 ലധികം ഗാനങ്ങൾ രചിച്ച ടാഗോറിന്റെ പേരിൽ രവീന്ദ്രസംഗീതം എന്ന സംഗീത ശാഖ തന്നെ രൂപം കൊണ്ടിട്ടുണ്ട്. 1889 മുതൽ 1945 വരെയുള്ള കാലഘട്ടത്തിൽ രവീന്ദ്രനാഥ ടാഗോർ 90 ലധികം പരസ്യചിത്രങ്ങളുടെ ഭാഗമായി മാറിയിരുന്നു. ഇതിൽതന്നെ നെയ്യ്, സൗന്ദര്യവർധക വസ്തുക്കൾ ,മധുരപലഹാരങ്ങൾ ,ഹാർമോണിയം ,തുടങ്ങിയവയുടെ പരസ്യങ്ങളും ഉണ്ടായിരുന്നു. 1912 ലാണ് രണ്ടാം തവണ ടാഗോർ ലണ്ടനിലേക്ക് പോയത് തന്റെ പുത്രനായ രതീന്ദ്രനാഥിനോടും  മരുമകളോടും  ത്രിപുര രാജകുടുംബാംഗമായ സൗമേന്ദ്രദേബ് ബർമനോടും ഒന്നിച്ചായിരുന്നു. ടാഗോർ തന്നെ ഇംഗ്ലീഷിലേക്ക് തർജ്ജമ നിർവഹിച്ച
ഗീതാഞ്ജലിയുടെ കയ്യെഴുത്തുപ്രതി ചിത്രകാരനും കലാ നിരൂപകനുമായ വില്യം റോത്തൻസ്റ്റീനെ കാണിക്കുകയും അത് വഴി വില്യം ബട്ലർ യീറ്റ്സിനെ കൊണ്ട് അവതാരിക എഴുതിക്കുക എന്നതുമായിരുന്നു യാത്രാ ലക്ഷ്യം.എന്നാൽ ലണ്ടനിലെത്തി റോത്തൻസ്റ്റീനിന്റെ വീട്ടിലേക്കുള്ള യാത്രാമധ്യേയാണ് ഗീതാജ്ഞലിയുടെ കൈയ്യെഴുത്തുപ്രതി സൂക്ഷിച്ച ചെറിയ സഞ്ചി നഷ്ടപ്പെട്ട കാര്യം മഹാകവി അറിഞ്ഞത്. പരിഭ്രാന്തനായ അദ്ദേഹം മകനെ അത് അന്വേഷിക്കാനായി പറഞ്ഞയച്ചു.ഭാഗ്യവശാൽ ബേക്കർ സ്ട്രീറ്റ് സ്റ്റേഷനിലെ നഷ്ടപ്പെട്ട സാധനങ്ങൾ സൂക്ഷിക്കുന്ന ഓഫീസിൽ നിന്നും കയ്യെഴുത്തുപ്രതി അടങ്ങിയ സഞ്ചി തിരികെ ലഭിച്ചു. തൊട്ടടുത്ത ദിവസം തന്നെ വില്യം റോത്തൻ സ്റ്റീനെകാണുകയും അതുവഴി വില്യം ബട്ലർ യീറ്റ്സിനെ കൊണ്ട് അവതാരിക എഴുതിക്കുകയും ചെയ്തു. 1912 നവംബറിൽ 103 കവിതകളുടെ സമാഹാരം ആയി ലണ്ടൻ ഇന്ത്യ സൊസൈറ്റി ഗീതാഞ്ജലി പ്രസിദ്ധീകരിച്ചു .തുടർന്ന് 1913 ൽ പ്രസിദ്ധീകരണം മാക് മില്ലൻ ഏറ്റെടുത്തു. തോമസ് എസ് മൂർ ടാഗോറിൻറെ പേര് നൊബേൽ സാഹിത്യ സമ്മാനത്തിനായി നാമനിർദ്ദേശം ചെയ്തു. 1913  നവംബർ 13 നാണ് നൊബേൽ പുരസ്കാര കമ്മിറ്റി ആ വർഷത്തെ സാഹിത്യ നൊബേൽ സമ്മാനം രവീന്ദ്രനാഥടാഗോറിനാണ് എന്ന കാര്യം ഔദ്യോഗികമായി ലോകത്തെ അറിയിച്ചത്. നവംബർ 14നാണ് ഇക്കാര്യം കൊൽക്കത്തയിലായിരുന്ന മഹാകവി ടെലഗ്രാം മുഖേന അറിയുന്നത്.അങ്ങിനെ 1913 ൽ ഗീതാഞ്ജലിയിലൂടെ യൂറോപ്യനല്ലാത്ത ഒരു വ്യക്തിക്ക് ആദ്യമായി സാഹിത്യ നൊബേൽ സമ്മാനം ലഭിക്കുകയും ,സാഹിത്യ നൊബേൽ സമ്മാനം നേടുന്ന ആദ്യത്തെ ഏഷ്യക്കാരൻ ആയി ടാഗോർ മാറുകയും ചെയ്തു. നൊബേൽ പുരസ്കാര കമ്മറ്റി ഇങ്ങിനെ കുറിച്ചു " because of his profoundly sensitive, fresh and beautiful verse, by which, with consummate skill, he has made his poetic thought, expressed in his own English words, a part of the literature of the West." ഡിസംബർ പത്തിന് സ്റ്റോക്ക് ഹോമിൽ വെച്ച് സമ്മാനം നേരിട്ട് സ്വീകരിക്കാൻ കവിക്ക് സാധിച്ചില്ല. ബ്രിട്ടീഷ് അംബാസഡറായിരുന്ന ൈക്ലവ് ഏറ്റു വാങ്ങിയ പുരസ്കാരം 1914 ജനുവരി ഒമ്പതിന് ബംഗാൾ ഗവർണർ കാർ മൈക്കേൽ പ്രഭു ടാഗോറിന് കൈമാറി. വർഷങ്ങൾക്ക് ശേഷം 1921 മെയ് 26നാണ് ടാഗോർ നൊബേൽ ലക്ചർ നടത്തിയത് എന്നതും ചരിത്രം. 1915 ൽ ബ്രിട്ടീഷ് സർക്കാർ ടാഗോറിനെ പ്രഭു സ്ഥാനം നൽകി ആദരിച്ചു.എങ്കിലും ജാലിയൻവാലാബാഗ് കൂട്ടക്കൊലയുമായി ബന്ധപ്പെട്ട പ്രതിഷേധത്തെ തുടർന്ന് അദ്ദേഹം പ്രഭു പദവി ഉപേക്ഷിച്ചു.സാഹിത്യ സംഗീത ലോകത്ത് വ്യാപാരിക്കും പോഴും ഇന്ത്യൻ ദേശീയ പ്രസ്ഥാനവുമായി ബന്ധപ്പെട്ട പ്രവർത്തിക്കാനും ടാഗോർ സമയം കണ്ടെത്തി. മൂന്ന് രാജ്യങ്ങളുടെ ദേശീയ ഗാനത്തിൽ അദ്ദേഹത്തിന് പങ്കുവഹിക്കാൻ സാധിച്ചു. ഇന്ത്യൻ ദേശീയ ഗാനമായ ജനഗണമന രചിച്ച ടാഗോർ , 1905-ലെ ബംഗാൾ വിഭജനവുമായി ബന്ധപ്പെട്ട പ്രതിഷേധസൂചകമായി രചിച്ച അമർ സോനാർ ബംഗ്ലാ 1971 ബംഗ്ലാദേശിന് ദേശീയ ഗാനമായി അംഗീകരിക്കപ്പെട്ടു.രവീന്ദ്രനാഥടാഗോറിൽ നിന്നും പ്രചോദനമുൾക്കൊണ്ട് അദ്ദേഹത്തിൻറെ ശിഷ്യനായ ആനന്ദ് സമരക്കൂനാണ് ശ്രീലങ്കയുടെ ദേശീയ ഗാനമായ ശ്രീലങ്ക മാതാ രചിച്ചത്.സാമ്പത്തിക ശാസ്ത്ര നൊബേൽ സമ്മാനം ലഭിച്ച ആദ്യത്തെ ഇന്ത്യക്കാരനായ അമര്ത്യാസെന്നിന് ആ പേര് നൽകിയതിന് പിന്നിലും ടാഗോറിന്റെ പങ്കുണ്ട്.5 വൻകരകളിലായി 30ലേറെ രാജ്യങ്ങൾ സഞ്ചരിച്ച  ആ മഹാ പ്രതിഭാശാലി 1941 ഓഗസ്റ്റ് 7-ന് ഈ ലോകത്തോട് വിട വാങ്ങി. കുടുംബത്തിലെ മരണപരമ്പരകളും മകളുടെ ദുരന്തദാമ്പത്യജീവിതവും വിഷാദത്തിലേക്ക് വലിച്ചെറിഞ്ഞ ടാഗോറിനെ ശക്തമായി നിലനിർത്താൻ സഹായിച്ചത് കലയും സാഹിത്യവും തന്നെയായിരുന്നു. 2014 ടാഗോറും അദ്ദേഹത്തിൻറെ നൊബേൽ സമ്മാനവും വീണ്ടും വാർത്തകളിൽ ഇടം കണ്ടെത്തി എത്തി. വിശ്വഭാരതി യിൽ സൂക്ഷിച്ച ടാഗോറിന്റെ നൊബേൽ മെഡലുകൾ അവിടെ നിന്നും മോഷണം പോയി. അത് കണ്ടെത്താൻ സാധിക്കാത്തതിനാൽ സ്വീഡിഷ് അക്കാദമി മെഡലിന്റെ രണ്ട് പതിപ്പുകൾ വിശ്വഭാരതിക്ക് നൽകി.നഷ്ടപ്പെട്ട കയ്യെഴുത്തുപ്രതി  കണ്ടെത്താൻ അദ്ദേഹത്തിന് സാധിച്ചെങ്കിലും നഷ്ടപ്പെട്ട നൊബേൽ മെഡലുകൾ കണ്ടെത്താൻ നമുക്ക് ഇന്നും സാധിച്ചിട്ടില്ല.
jitheshmaniyat@gmail.com

നൊബേൽ കമ്മറ്റിക്ക് താൽപര്യമില്ലാതിരുന്ന സ്വപ്ന വ്യാഖ്യാതാവ്

       മെയ് 6.. സ്വപ്നങ്ങൾ അബോധ മനസ്സിലേക്കുള്ള രാജപാതയാണ് എന്ന് സിദ്ധാന്തിച്ച, അന്ധവിശ്വാസത്തിന്റെ കെട്ടുപാടുകളിൽ കിടന്ന മനശാസ്ത്രത്തെ അതിൽ നിന്ന് മോചിപ്പിച്ച് ഒരു ശാസത്ര ശാഖയായി മാറ്റുന്നതിൽ നിർണായക പങ്ക് വഹിച്ച , മാനസികാപഗ്രഥനത്തെ മറ്റൊരു തലത്തിലേക്ക് വളർത്തിയ ലോക പ്രശസ്ത മനശാസ്ത്രജ്ഞൻ സിഗ്മണ്ട് ഫ്രോയ്ഡ് പഴയ ചെക്കോസ്ലോവാക്യയിലെ മൊറാവിയയിൽ ഫ്രേയ്ബർഗിൽ 1856 ൽ ജനിച്ചത് ഇതേ ദിവസത്തിലാണ്.പഠനത്തിന് ശേഷം 1885-1886 കാലഘട്ടത്തിൽ പാരീസിലെ ഴാങ്ങ് മാർട്ടിൻ ഷാർക്കെയുടെ കീഴിലെ പഠനം സിരാരോഗങ്ങളും മനസും തമ്മിലുള്ള ബന്ധത്തെ കുറിച്ച് കൂടുതലറിയാൻ ഫ്രോയ്ഡിനെ സഹായിച്ചു. ഫ്രോയ്ഡിനെ ഏറെ സ്വാധീനിച്ച ഇദ്ദേഹത്തിന്റെ സ്മരണാർത്ഥം ഫ്രോയ്ഡ് തൻറെ ആദ്യ പുത്രന് മാർട്ടിൻ എന്ന പേര് നൽകി. മനഃശാസ്ത്ര ഗവേഷണത്തിൽ ഏറെ മുന്നോട്ടു പോകാൻ ഫ്രോയ്ഡിന് പിന്നീട് സാധിച്ചു. ഹിസ്റ്റീരിയ രോഗത്തിൻറെ ഉത്ഭവസ്ഥാനം ഗർഭപാത്രത്തിൽ നിന്നാണ് എന്ന അതുവരെ ഉണ്ടായിരുന്ന വിശ്വാസത്തെ ഫ്രോയ്സ് തിരുത്തിയെഴുതി. ഹിസ്റ്റീരിയ എന്ന വാക്കിന്റെ അർത്ഥം തന്നെ ഗർഭപാത്രത്തിന്റെ സഞ്ചാരം എന്നാണ്. 1882 ലാണ് ഫ്രോയ്ഡ് മാർത്ത ബെർണേസിനെ കണ്ടുമുട്ടുന്നത്.നാല് വർഷത്തിനുള്ളിൽ തൊള്ളായിരത്തിലേറെ പ്രണയ കത്തുകൾ ഫ്രോയ്ഡ് എഴുതി. 1896 ലാണ് ആണ് ഫ്രോയ്ഡിനെ ലോകശ്രദ്ധയിലേക്ക് എത്തിച്ച സൈക്കോ അനാലിസിസ് എന്ന പദം അദ്ദേഹം ആദ്യമായി ഉപയോഗിക്കുന്നത്. 1895 കാലഘട്ടത്തിൽ എഴുതാൻ ആരംഭിച്ച ലോകപ്രസിദ്ധമായ ഇൻറർപ്രട്ടേഷൻ ഓഫ് ഡ്രീംസ് എന്ന പുസ്തകം 1899 ൽ പൂർത്തിയാക്കാൻ സാധിച്ചു. ആദ്യ ആറ് വർഷം കൊണ്ട് ഈ പുസ്തകത്തിന്റെ 351 കോപ്പികൾ മാത്രമാണ് വിറ്റുപോയത് . രണ്ടാം പതിപ്പ് പുറത്തിറങ്ങാൻ 10 വർഷം വേണ്ടിവന്നു. വ്യക്തിത്വഘടനയിൽ ഇദ്ദ്,ഈഗോ ,സൂപ്പർ ഈഗോ എന്നീ ഘടകങ്ങളെ വിശദീകരിച്ച സിഗ്മണ്ട് ഫ്രോയ്ഡിന്റെ , വ്യക്തിത്വത്തെ കുറിച്ചുള്ള നിഗമനങ്ങളിൽ ഏറ്റവും വിവാദം സൃഷ്ടിച്ചത് മനോ ലൈംഗിക വികാസത്തെ കുറിച്ചുള്ള സങ്കല്പങ്ങൾ ആയിരുന്നു.ഈ വികാസ പ്രക്രിയയിൽ അദ്ദേഹം oral, anal, phallic, latency, genital എന്നിങ്ങനെ അഞ്ച് ഘട്ടങ്ങളെ കുറിച്ചാണ് വിശദീകരിക്കുന്നത്. ഈ ഘട്ടങ്ങളെ കുറിച്ച് വിശദീകരിക്കുമ്പോഴാണ് ഈഡിപ്പസ് കോംപ്ലക്സ് ,ഇലക്ട്രാ കോംപ്ലക്സ് എന്നിവയെ കുറിച്ച് പറയുന്നത്. ഇരുപത്തിനാലാം വയസ്സിൽ ആരംഭിച്ച പുകവലിശീലം അദ്ദേഹത്തെ ദോഷകരമായി തന്നെ ബാധിച്ചു. ഒരു ചെയിൻസ്മോക്കർ ആയിരുന്ന അദ്ദേഹം ദിനംപ്രതി ഇരുപതിലധികം സിഗരറ്റുകൾ വലിക്കുമായിരുന്നു എന്നാണ് ജീവചരിത്രകാരന്മാർ പറയുന്നത്. അതു കൊണ്ടു തന്നെ 1923 ൽ അദ്ദേഹത്തിന് മൗത്ത് കാൻസർ കണ്ടെത്തിയ ശേഷം 16 വർഷം കൊണ്ട് 33 സർജറിക്ക് അദ്ദേഹത്തിന് വിധേയരാകേണ്ടി വന്നു. തൻറെ പുകവലിശീലം തന്റെ ക്രിയേറ്റിവിറ്റിയും പ്രൊഡക്ടിവിറ്റിയും കൂട്ടും എന്ന് കടുത്ത വിശ്വാസക്കാരൻ ആയിരുന്നു അദ്ദേഹം. ഒരു ജൂത കുടുംബത്തിലാണ് ജനിച്ചതെങ്കിലും  നിരീശ്വരവാദിയായിരുന്ന സിഗ്മണ്ട് ഫ്രോയ്ഡ് നാസികളുടെ കണ്ണിലെ കരടായിരുന്നു.അവർ അദ്ദേഹത്തിൻറെ പുസ്തകങ്ങൾ ചുട്ടെരിക്കുകയും വീട് റെയ്ഡ് ചെയ്യുകയും ചെയ്തു.ഇതേക്കുറിച്ച് അദ്ദേഹംപറഞ്ഞു "എന്ത് പുരോഗതിയാണ് നാം കൈവരിച്ചത് -മധ്യകാലഘട്ടത്തിൽ ആയിരുന്നു എങ്കിൽ അവർ എന്നെ ജീവനോടെ ചുട്ടു കൊല്ലുമായിരുന്നു .ഇപ്പോൾ അർ  പുസ്തകങ്ങൾ അഗ്നിക്കിരയാക്കി സംതൃപ്തിയടയുന്നു.". അതിന് ശേഷം പാരീസിലേക്കും തുടർന്ന് ലണ്ടനിലേക്കും പാലായനം ചെയ്യേണ്ടി വന്ന അദ്ദേഹത്തിന്റെ , നാല് സഹോദരിമാർ കോൺസൻട്രേഷൻ ക്യാമ്പിൽ വെച്ച് അന്ത്യശ്വാസം വലിച്ചു .1915 മുതൽ 1938 വരെയുള്ള കാലയളവിൽ 13 തവണ അദ്ദേഹം നോബൽ സമ്മാനത്തിന് നാമനിർദ്ദേശം ചെയ്യപ്പെട്ടു.അതിൽ 12 തവണ വൈദ്യശാസ്ത്രത്തിലും ഒരു തവണ സാഹിത്യത്തിനും ആയിരുന്നു. 1915 ൽ വില്യം എ വൈറ്റ് ആണ് ഇദ്ദേഹത്തെ ആദ്യമായി നൊബേൽ സമ്മാനത്തിന് അതിന് നാമനിർദേശം ചെയ്തത്. ആ വർഷം ആർക്കും നൊബേൽസമ്മാനം നൽകിയില്ല.1917 ൽ നാമനിർദ്ദേശം ചെയ്യപ്പെട്ടപ്പോൾ അതിൽ പറഞ്ഞത് "വർക്ക് ഓൺ സ്പിരിച്വൽ ലൈഫ് ആൻഡ് ക്ലോസ് ലി റിലേറ്റസ് ഫീൽഡ് " എന്നതിനാണ് ഈ നാമനിർദേശം എന്നാണ്. ഇതിൽ നിന്ന് തന്നെ മനസ്സിലാക്കാം അക്കാലത്ത് എങ്ങനെയാണ് ഫ്രോയ്ഡ് മനസ്സിലാക്കപെട്ടത് എന്ന്.1937  ൽ 14 പേർ അദ്ദേഹത്തെ വൈദ്യശാസ്ത്ര നൊബേൽ സമ്മാനത്തിനായി നാമനിർദേശം ചെയ്തിരുന്നു .എന്നാൽ ആ വർഷവും അദ്ദേഹത്തിന് നോബൽ നൽകിയില്ല.1936 ലെ സാഹിത്യ നോബൽ സമ്മാനത്തിനായി 1915 ലെ സമ്മാനജേതാവായ റൊമൈൻ റോളണ്ട് നാമനിർദേശം ചെയ്തിരുന്നു. നൊബേൽ സെലക്ഷൻ കമ്മിറ്റിക്ക് ഫ്രോയ്ഡ് അത്ര താല്പര്യം ഉള്ള വ്യക്തി ആയിരുന്നില്ല. ഒരു കമ്മറ്റി ഇങ്ങിനെ കുറിച്ചു" Freud's entire  psychoanalytic theory, as its appears to us today is largely based on hypothesis". സിഗ്മണ്ട് ഫ്രോയ്ഡിൻറെ സംഭാവനകളെ ശാസ്ത്രത്തോട് ചേർത്ത് നിർത്താൻ നൊബേൽ കമ്മിറ്റി തയ്യാറായിരുന്നില്ല. 1939 സെപ്റ്റംബർ മാസം തന്റെ സുഹൃത്തും ഡോക്ടറുമായ മാക്സ് ഷൂറിന്റെ കൈപിടിച്ച് മുമ്പ് തനിക്ക് നൽകിയ "അനാവശ്യമായി പീഡിപ്പിക്കില്ല" എന്ന വാഗ്ദാനം നിറവേറ്റാൻ നടത്താൻ ആവശ്യപ്പെട്ടു.അങ്ങിനെ 1939 സെപ്തംബർ 23ന് , താൻ കണ്ടെത്തിയത് ദ്വീപുകൾ മാത്രമാണെന്നും തനിക്ക് പുറകേ വരുന്നവർ വൻകരകൾ തന്നെ കണ്ടെത്തുമെന്നും പ്രത്യാശ പ്രകടിപ്പിച്ച ആ മഹാപ്രതിഭ തന്റെ ഡോക്ടറുടെ സഹായത്തോടെ ലോകത്തോട് വിടവാങ്ങി.